Maandelikse Argief vir June, 2009

Bure, nie slotte, keer huisbraak

Gepubliseer
deur
Nantes
op 9 June 2009
in Misdaad Nuus
. Gesluit

Bure, nie slotte, keer huisbraak

Jun 08 2009 08:42:46:960PM

Veiligheidsmaatreëls tuis verlaag nie noodwendig jou kanse om ’n slagoffer van huisbraak te word nie.

Susan Cilliers

Veiligheidsmaatreëls tuis verlaag nie noodwendig jou kanse om ’n slagoffer van huisbraak te word nie.

Hoe beter mense mekaar egter in ’n gemeenskap ken en na mekaar omsien, hoe kleiner die kans dat hulle sal deurloop.

Die Instituut vir Sekerheidstudie (ISS) het dié en ander bevindinge in ’n studie oor waar watter misdade die meeste in Suid-Afrika voorkom en wie die kwesbaarste slagoffers is, onlangs bekend gemaak.

Een uit elke vyf mense wat aan ’n meningspeiling vir dié studie in 2007 deelgeneem het, was in die voorafgaande 12 maande óf slagoffers van misdaad óf het gesien hoe iemand in hul huishoudings geteiken word.

Dit het geblyk misdadigers teiken ryker en groter huishoudings meer dikwels as hul armer, kleiner bure.

Inwoners van Gauteng en KwaZulu-Natal loop die grootste gevaar om hul besittings weens diefstal te verloor.

Die Wes- en Noord-Kaap is die provinsies waar geweldmisdade soos rooftogte en aanranding die meeste voorkom.

Bruin mense is die kwesbaarste bevolkingsgroep wat huisbrake betref, met swart mense kort op hul hakke.

Behalwe vir huisbrake, is stedelike Suid-Afrikaners meer gereeld die slagoffers van misdaad as hul plattelandse medeburgers. Eiendomsmisdaad is die mees algemene misdaad – altesame 81% van die respondente het eiendomsmisdaad beleef, terwyl 23% geweldmisdade beleef het.

Huisbraak, diefstal van persoonlike besittings, omkoopversoeke van regeringsamptenare en diefstal van eiendom uit motors was die mees algemene maniere waarop respondente deurgeloop het.

Vroeëre navorsing het gewys jonger mense in Suid-Afrika (veral tussen die ouderdom van 16 en 35) is waarskynlik meer dikwels slagoffers van geweldmisdaad.

Mense wat gereeld sosiaal verkeer en meer geneig is om alkohol te gebruik, se kanse is ook groter om slagoffers van misdaad te word.

Die ISS het in sy 2007-studie op die rol van die volgende risiko-faktore vir misdaad gefokus: demografiese faktore soos ouderdom, geslag en ouderdomsgroep; woongebied; sosio-ekonomiese status; veiligheidsfaktore in die gebied waar die respondente woon en omgewingsfaktore soos die mate waartoe mense in ’n bepaalde gemeenskap by mekaar betrokke is en mekaar beskerm.

 

 http://jv.news24.com/Beeld/Suid-Afrika/0,,3-975_2527867,00.html

Só lyk polisie se planne

Gepubliseer
deur
Nantes
op 5 June 2009
in Misdaad Nuus
. Gesluit

Só lyk polisie se planne

Jun 04 2009 10:21:57:130PM

Die polisie gaan meer speurders ontplooi, gemeenskapspolisiëring aanmoedig en die weermag vra om transito-rooftogte te beveg in ’n poging om misdaad met tot 10% per jaar te verminder.

Rajaa Azzakani

Die polisie gaan meer speurders ontplooi, gemeenskapspolisiëring aanmoedig en die weermag vra om transito-rooftogte te beveg in ’n poging om misdaad met tot 10% per jaar te verminder.

So het mnr. Nathi Mthethwa, nasionale minister van polisie, gister in die debat op pres. Jacob Zuma se staatsrede gesê.

Hy het gesê daar is tans sowat 12 900 polisiebeamptes wat opleiding as speurders ontvang, waarvan 1 200 reeds in die gevorderde klas is.

Mthethwa het beklemtoon dat die regering sal voortgaan met planne om sogenaamde straatgemeenskappe te stig om die polisie te help in sy stryd om hulle te beskerm.

“Geen polisiemag kan te alle tye oral wees nie. Dit het tyd geword dat misdaad op die agenda van elke huishouding kom in ’n poging om vrede, veiligheid en troos na ons gemeenskappe terug te bring.

“Daar móét ’n vennootskap tussen die publiek en die polisie wees,” het hy gesê.

Mthethwa het terselfdertyd kritiek oor sy plan om die jeug by misdaad-bekamping betrokke te kry afgeskud.

Hy het gesê die “jong leeus” het die vermoë om misdaad ’n knou toe te dien.

Volgens hom is dit net diegene wat ryk genoeg is om self veiligheidsmaatskappye te huur om hulle te beveilig en hulle buite die werklikheid van misdaad te plaas wat oor dié plan kla. “Hulle hoë veiligheidsmure het hulle verblind.”

Hy het gewaarsku dat misdaadvlakke wat nog bo regeringsteikens is, die vordering van die anti-apartheidstryd ongedaan kan maak.

Mthethwa het gesê die nuwe direktoraat vir die ondersoek van prioriteitsmisdade (DOPM), wat die Skerpioene vervang, sal vroeg aanstaande maand volledig operasioneel wees.

http://jv.news24.com/Beeld/Suid-Afrika/0,,3-975_2526799,00.html

Polisie wysig wapenwet

Gepubliseer
deur
Nantes
op 5 June 2009
in Kennisgewings en Misdaad Nuus
. Gesluit

Polisie wysig wapenwet

Jun 05 2009 01:57:43:817AM

Jóhann Thormählen

Slegs ’n maand voordat die nuwe vuurwapenwet in werking tree, het die polisie wapenwetgewing gewysig.

Slegs ’n maand voordat die nuwe vuurwapenwet in werking tree, het die polisie wapenwetgewing gewysig. Vuurwapeneienaars wat hul wapens privaat wil verkoop of skenk, kan nou ’n tydelike permit kry en die wapens hou totdat ’n nuwe aansoeker se lisensie goedgekeur is.

Luidens ’n opdrag wat deur die polisie op 28 Mei uitgereik is, kan vuurwapeneienaars, wat wapens ingevolge die ou wet besit, aansoek doen om ’n tydelike permit van 12 maande terwyl ’n nuwe aansoeker op ’n lisensie wag.

Die nuwe wapenwet tree op 1 Julie in werking en aansoeke om dié permitte moet voor dan ingedien word.

Volksblad het vroeër berig die polisie bepaal dat vuurwapeneienaars wat hul wapens privaat wil verkoop of skenk, dit steeds moet inlewer indien die nuwe aansoeker se lisensie nog nie teen teen 30 Junie goedgekeur is nie. Dit moet intussen by die polisie geberg word totdat ’n lisensie goedgekeur is.

Die nuwe opdrag bepaal ’n aansoeker om ’n tydelike permit moet steeds aan bergingsregulasies soos ’n standaard kluis voldoen.

Die permit verleen slegs goedkeuring vir berging van ’n vuurwapen en gevolglik mag die wapen nie gebruik word nie.

Verkopers of skenkers hoef nie ’n bewys van goedkeuring van die nodige toetse en opleiding te toon wanneer daar om ’n permit aansoek gedoen word nie, omdat die wapen slegs tydelik geberg word.

Aansoeke om dié permit kan by die polisie se provinsiale kantoor goedgekeur word en hoef dus nie nasionaal te geskied nie.

Vir die oorgangstydperk of tydelike permit om te geld moet ’n koper of ontvanger van ’n vuurwapen voor 1 Julie om ’n lisensie aansoek doen en die verkoper ook voor daardie dag om die tydelike permit.

Luidens die opdrag moet alle polisiekantore ’n “massiewe kommunikasieveldtog” in hul provinsies begin om te verseker vuurwapeneienaars is ingelig oor wetgewing en weet waar om hul wapens en ammunisie in te lewer.

http://jv.news24.com/Die_Volksblad/Nuus/0,,5-83_2526837,00.html