Afriforum 911

Aug 19 2009 01:07:01:640AM

Die manier waarop regstellende aksie in die staatsdiens toegepas word, het in die arbeidshof ’n bloedneus gekry. In ’n skikking voor die hof is vier polisiebeamptes, gelyk gegee op hul beswaar.

Jan de Lange

Die manier waarop regstellende aksie in die staatsdiens toegepas word, het in die arbeidshof ’n bloedneus gekry.

In ’n skikking voor die hof is vier polisiebeamptes, wat vyf jaar gelede bevordering ontsê is, met terugwerkende krag gelyk gegee op al die punte van hul beswaar.

Die Suid-Afrikaanse Polisiediens (SAPD) het die skikking inderhaas en onverwags aangebied en sodoende gekeer dat regspraak ontwikkel oor kritieke aspekte van regstellende aksie. Die geding van die vier beamptes was die belangrikste toetssaak nóg oor regstellende aksie in die staatsdiens.

Die saak, wat deur vier forensiese wetenskaplikes aanhangig gemaak is, is eergister geskik deur alle eise toe te staan waarom hulle reeds in November 2004 gevra het: onmiddellike bevordering wat destyds geweier is weens hul velkleur, asook volle terugwerkende vergoeding asof hulle destyds reeds bevorder is.

In dié saak het die SAPD besluit om kernposte vakant te laat eerder as om wit kandidate aan te stel.

Die wit aansoekers wat geweier is, was ten volle vir dié hoogs kundige poste gekwalifiseer – met formele opleiding en jare lange ervaring.

Dié gebruik om poste eerder vakant te los wanneer gekleurde kandidate nie daarvoor gevind kan word nie, is algemene praktyk – nie net in die SAPD nie, maar regdeur die staatsdiens, het twee onafhanklike staatsdiensvakbonde gister gesê.

Solidariteit het die saak namens die vier forensiese wetenskaplikes, inspp. Lionel de Jager, Corlett van Ham, Hannes Geustyn en H. Ueckermann, gevoer. ’n Vertroulikheidsklousule in die skikking het die vakbond en die vier beamptes die mond gesnoer.

“Ons kan niks meer daaroor sê as dat ons tevrede is nie,” het mnr. Dirk Hermann, adjunkhoof van Solidariteit, gister gesê.

’n Skriftelike regsmening wat vir die saak aangevra is van adv. John Grogan SC, een van die top-arbeidsregspraktisyns in die land, lui dat regstellende aksie “iets moet bereik, verkieslik dat dit voorheen benadeeldes moet beskerm of help”.

“Hoe kan aangevoer word dat dit enige voorheen benadeelde kandidaat help of beskerm deur ’n pos vakant te laat bly?” het Grogan in sy pleitstuk gevra.

Die SAPD het die dienste van die staatsprokureur beëindig en prokureurs van Bowman Gilfillan, een van die land se grootste regsfirmas, vir die saak gehuur.

’n Skikking is onlangs aangegaan en is eergister ’n bevel van die hof gemaak. Dit is nou ’n openbare dokument.

De Jager en Van Ham is albei chemiese ontleders in die SAPD se forensiese laboratorium in Pretoria met nagraadse kwalifikasies in chemie en onderskeidelik 12 en sewe jaar ondervinding.

Hulle is in September verlede jaar in elk geval van inspekteurs tot kapteins bevorder, maar kry nou terugwerkende vergoeding asof hulle reeds in Desember 2004 kapteins was toe hul bevordering weens hul velkleur geweier is.

Geustyn, ’n forensiese ondersoeker, word onmiddellik tot ’n kaptein bevorder en kry ook volle terugwerkende vergoeding.

Ueckermann, ’n mineraloog met ’n M.Sc.-graad in chemie en 12 jaar ondervinding in fisiese en chemiese ontledings, het weens perke op sy loopbaan geëmigreer.

Mnr. Neal Truter, adjunkpresident van die Suid-Afrikaanse Polisie-unie (Sapu), het gister gesê dié vakbond is op die oomblik in verskeie dispute gewikkel waarin bevordering aan wit polisie-lede geweier word ondanks die feit dat geen gekleurde kandidate gevind kan word nie.

http://jv.news24.com/Beeld/Suid-Afrika/0,,3-975_2548870,00.html

Aug 19 2009 01:07:17:830AM

’n Veiligheidswag en ’n tronkbeampte is gister gewond toe minstens tien transitorowers in minstens drie voertuie ’n geldwa op die Moloto-pad, noord van Pretoria, in ’n hinderlaag gelei het.

Hilda Fourie

’n Veiligheidswag en ’n tronkbeampte is gister gewond toe minstens tien transitorowers in minstens drie voertuie ’n geldwa op die Moloto-pad, noord van Pretoria, in ’n hinderlaag gelei het.

Die rowers het met leë hande gevlug, het me. Wendy Hardy, woordvoerder van Group 4 Securicor (G4S), gesê.

Mnr. Johannes Jaftha, polisiewoordvoerder, het gesê die G4S-geldwa het gister omstreeks 09:00 geld van Moloto na Pretoria vervoer.

By ’n duik in die pad, sowat 10 km buite Moloto, het drie voertuie die pad vir verkeer versper.

Daar was volgens ooggetuies nóg verdagte voertuie waaruit die omgewing dopgehou is.

Van die rowers het langs die geldwa ingetrek en met swaarkaliber-vuurwapens op die bestuurder losgebrand.

Hy is volgens Jaftha in die been getref.

Die rowers het toe ’n ander veiligheidswag, wat agter in die geldwa gesit het, gedwing om die deur oop te maak.

Toe het hulle die wag met vuiste geslaan en in die veld gegooi.

Die rowers het die kluis in die geldwa met springstof opgeblaas, het Jaftha gesê.

Kort daarna het hulle losgebrand op twee tronkbeamptes van die Zonderwater-gevangenis in Cullinan wat op die toneel aangekom en ’n U-draai probeer maak het.

Een van die beamptes is in die hand en in die been getref.

Die polisie was binne minute op die toneel.

Hulle het die gewonde wag gestabiliseer voordat hy na ’n hospitaal geneem is.

Drie voertuie wat die rowers gebruik het, is minder as ’n uur later verlate vanuit die polisiehelikopter op die De Tweede Spruit-pad, sowat 8 km van die toneel, opgemerk.

’n Silwer Mercedes-Benz E280 se enjin het nog geluier.

Daaragter het ’n BMW 528i gestaan en aan die ander kant van die pad ’n Audi A4.

Die voertuie is almal vermoedelik gesteel.

Die rowers het óf die bosse ingehardloop óf hulle is in ’n wegkommotor weg, het Jaftha gesê.

’n Groot deel van die Moloto-pad was gister vir verkeer gesluit terwyl die polisie die toneel ondersoek het.

Die gewonde beampte is ná behandeling ontslaan.

http://jv.news24.com/Beeld/Suid-Afrika/0,,3-975_2548856,00.html

Aug 18 2009 02:29:28:560AM

Verslagspan

’n Bloemfonteinse man is na pres. Jacob Zuma se kantoor met ’n verslag wat bewerings bevat oor wanbestuur en korrupsie in die Vrystaatse polisie.

’n Bloemfonteinse man is na pres. Jacob Zuma se kantoor met ’n verslag wat bewerings bevat oor wanbestuur en korrupsie in die Vrystaatse polisie.

“Die president se openingsrede waarin hy lojale landsburgers gevra het om korrupsie aan te meld, het my laat besluit om nie langer stil te bly oor wat ek weet nie,” sê mnr. George Mashale, ’n voormalige polisie-reservis.

Mashale is self weens korrupsie in hegtenis geneem, waarna die verhoor in die hof teruggetrek is. Hy het ’n siviele eis teen die staat ingestel.

Mashale het ’n verslag saamgestel en dit Vrydag na die kantoor van die president gebring. Volksblad is in besit van die dokument waarvan die kantoor van die president ontvangs erken het.

Die verslag handel grootliks oor beweringe van korrupsie, wanbestuur, misbruik van mag en bedrog.

Van die bewerings behels die volgende:

- Komm. Amon Mashigo, provinsiale hoof van die polisie in die Vrystaat, het na bewering ’n ritmagtiging vir die gebruik van ’n staatsvoertuig vir sy sekretaresse gegee om met haar gesin Pretoria toe te ry vir ’n private aangeleentheid. ) ’n Vrou met ’n misdaadrekord is glo in opdrag van Mashigo aangestel. ) Misdaadstatistieke is na bewering aangepas met ’n besoek van die minister van polisie aan die begin van die jaar om die minister onder ’n wanindruk oor misdaad in die provinsie te bring. ) Mashigo het ook na bewering in 2008 ’n reis vir drie offisiere na sy skoonpa se begrafnis goedgekeur. Die offisiere het verder na bewering met hul terugkeer reis-en-verblyf-toelae geëis.

- Mashigo het na bewering vanjaar ook na Pretoria gevlieg en twee polisiebeamptes na Johannesburg gestuur om sy motor vir hom daarheen te bring. Die polisiebeamptes het met Mashigo se motor en ’n amptelike motor na Johannesburg gereis om dit vir Mashigo te bring en weer met die amptelike motor teruggekom. ’n Eis vir die reis en verblyf is ingedien.

Mashale het die president gevra om in te gryp en die beweringe te laat ondersoek.

“Dit is tyd dat die dinge wat verkeerd is in die Vrystaat, aan die lig gebring word.”

Sr.supt. Sam Makhele, provinsiale kommunikasiehoof van die polisie, het gister gesê indien die verslag by die president se kantoor ingedien is, kan die polisie in die provinsie nie daarop reageer nie.

“As die klaer reeds so ver as die president se kantoor gevorder het, beteken dit die saak is nou in die hande van die president. Indien enige ondersoek dus volg, sal dit deur sy (die president se) kantoor gedoen word.”

http://jv.news24.com/Die_Volksblad/Nuus/0,,5-83_2548570,00.html

Aug 15 2009 01:22:59:950AM

Stap jy die “nuwe” polisiestasie van Heidedal binne, kan jy nie glo dit is die stasie wat nog aan die begin van vanjaar soos ’n deurmekaar seunskool was nie.

Stap jy die “nuwe” polisiestasie van Heidedal binne, kan jy nie glo dit is die stasie wat nog aan die begin van vanjaar soos ’n deurmekaar seunskool was nie.

Die stasie spog ook met die eerste vroulike stasiebevelvoerder, oorspronklik van Upington.

Ons heet haar welkom in Heidedal.

Baie opvallend is die positiewe gesindheid van die gemeenskap in Heidedal deesdae.

Inwoners stap sommer vir ’n geselsie by die “sup” se kantoor in.

Hulle sê hulle het van die “oopdeur”-beleid wat sy toepas, gehoor.

En aan oom Smitty:

Dankie vir ook jou goeie werk by die polisiestasie.

Mense kan gerus by die Heidedal-polisiestasie ’n draai loop maak en sien hoe mooi dit deesdae daar lyk.

Jhanjé Hartzenberg

Murisonstraat 1c, Heidedal, Bloemfontein

http://jv.news24.com/Die_Volksblad/Briewe/0,,5-89_2548012,00.html